Nəzrin Məmmədova “QUALIA: TRACE / CODE” 30 oktyabr – 20 noyabr 2026 Artefact Gallery “QUALIA: TRACE / CODE” azərbaycanlı müasir rəssam Nəzrin Məmmədovanın yuxu və oyanıqlıq, reallıq və subyektiv təcrübə arasındakı qeyri-sabit sərhədi araşdıran fərdi sərgisidir. Sərginin əsasını oyanıqlığın nə üçün “real” reallıq kimi qəbul edilməsi, yuxunun isə onun ikinci dərəcəli vəziyyəti hesab olunması sualı təşkil edir. Məmmədovanı məkanın, zamanın və bədənin tanış koordinatlarının dağılmağa başladığı və şüurun reallığın öz versiyasını yaratdığı məqam maraqlandırır. Sərgidə abstrakt vizual sahələr, memarlıq fraqmentləri, izlər və kodlaşdırılmış strukturlar bir araya gəlir. Kod insanın subyektiv təcrübəni təsnif etmək, qeydə almaq, ölçmək və məlumatlara çevirmək istəyinin metaforasına çevrilir. Sərginin adı onun əsas strukturunu əks etdirir: QUALIA — yaşantının özü; TRACE — yaşantıdan sonra qalan iz; CODE — bu təcrübəni qeydə almaq və yenidən yaratmaq cəhdi. Nəzrin Məmmədovanın bədii praktikası identiklik, insan varlığı, qavrayış və fərdlə ətraf aləm arasındakı görünməz əlaqələrə yönəlir. Əsasən abstrakt rəngkarlıq sahəsində çalışan rəssam rəng, jest və ritmin qarşılıqlı əlaqəsi vasitəsilə maddi və qeyri-maddi olanın sərhədində mövcud olan çoxqatlı, intuitiv kompozisiyalar yaradır. Sərgi çərçivəsində rəssamın yaratdığı canlı səs performansı da təqdim olunacaq.